رسالة من أمي

تمنيتـَك لتعبي اتصير وفــّاي
وبعينك رجيت أيغزر ارباي
حسبتك شمعة ليَّ اتضوّي بالبيت
لچن يا حيف بيك أيخيب رجواي
يا ضنوة حياتي وشَوف العيون
ذخرتك للمنيّة اتنگط الماي
وتمنيتك لتعبي اتصير وفـّاي

يـ بدر التام ليش اتضُمَك غيوم
ترضى أمك تعيش ابگلب مهضوم
تسع تـ شهر اباري وگلبي ملهوف
لـَ بدرك من يهل حضّرت الاهدوم
رضَّعتـّك فرح ما ردتك أتهِِِـِم
دللتك وأنه الغرگانة بهموم
چنت احبس ونيني وخاف اصحيك
وسهر بالليالي و حسِب انجوم
شِلتَك بالجفون او صِغت الجناغ
من گلبي الجرحتة او عفته ملچوم
يالشديت بيك المهجة والراي
وتمنيتك لتعبي اتصير وفّاي

يبني اشعطلـََّك عنـّي يمحبوب
خلـّيت الدليل اخلافك ايلوب
يبني فراگ شخصك دوهن البال
مو تدري العمر بسنينه محسوب
أصبّـِح بسمك او ذِكر التصاوير
وظَل عطشانة مايَّك يبني چم دوُب
أحلـّّفــَك بالحليب و شيبة الراس
تروف ابگلبي وتضمِد المصيوب
أظل طول العمر يـ وليدي اتانيك
وعيوني بحزن تربي اعلى الدروب
يـ وليدي انهضَم من ونَتّي الناي
وتمنيتك لتعبي اتصير وفـّاي

يبني أتوسّدت هِدمَك يغالي
وَ لولي الرسمك ابطول الليالي
سألت الطير عنّك والهوى الهاب
وبَد ما بطلِت عنّك سؤالي
يـ شَعرة اِمن الگلب يا حالة خليت
مثل حال السدانة بماي حالي
نسيت ابـ زغرك اشگد چنت اباريك
تجازيني بجفى وتِنكُر دلالي
چا هيچي تجازي أمك بالفراگ
صرت وكت العطش تخبط زلالي
يـ وليدي اشكُبُر عند الله معناي
وتمنيتك لتعبي اتصير وفـّّاي

يـ هلال الفرح ضنيتك أتهِلْ
والـ حضِن أُمك أبكل عيد تنزِلْ
يالمبعِد وجرح أفراگك أمچيد
يالخليت شوگي ابصارمة ايسِلْ
نِثَرت بدربك أورود او رياحين
ونتة ابدربي شوچ الفرگة تشتلْ
أشِم اهدومك بمصباح كل عيد
وعيّـِد صورِتك والدمعة تهمِلْ
أهز كاروكك او أتصوّرَك بيه
ومن چلمة دللول ابد ما مِلْ
وطيوفك يـ روحي اتبات وياي
وتمنيتك لتعبي اتصير وفـّاي

چا يمتى تحِن الـ حضني وتعود
ووَرجَك عالدليل الچان ممرود
و شُبگك بالهلاهِل وطوي الاحزان
و ضُمَك بالجفون او لوعِتـّّي تهود
يازهرة حياتي او كحل العيون
تعال او خلي ننسة ايامنة السود
گلب أُمك انضربت بيه الامثال
يبني ونته گلبك صخر جلمود
يا فتشة العين و مُنية الروح
وآنه أوياك مثل الماي والعود
ويموت الهرش لو فارگ الماي
وتمنيتك لتعبي اتصير وفـّاي


هوامش:
الجناغ:حلية مصنوعة من الذهب او الفضة توضع على رأس الطفل
اللولي: فعل مضارع لكلمة (دللول) وهي ترانيم شعبية تؤديها الام لمساعدة الطفل على النوم
كاروك: سرير خشبي للأطفال تهزه الام حتى يخلد الطفل الى النوم


الشاعر
كاظم الوائلي